16.
Soḷasamavaggo
3.
Sukhānuppadānakathāvaṇṇanā
747-748. Sukhānuppadānakathāyaṃ yaṃ evarūpanti yaṃ nevattano, na paresaṃ, na tassa, evarūpaṃ nāma anuppadinnaṃ bhavituṃ na arahati aññassa asakkuṇeyyattāti laddhimattena paṭijānāti, na yuttiyāti adhippāyo.
Sukhānuppadānakathāvaṇṇanā niṭṭhitā.
4.
Adhigayhamanasikārakathāvaṇṇanā
749-753. Taṃcittatāyāti tadeva ārammaṇabhūtaṃ cittaṃ etassāti taṃcitto, tassa bhāvo taṃcittatā, tāya taṃcittatāya. Taṃ vā ālambakaṃ ālambitabbañca cittaṃ taṃcittaṃ, tassa bhāvo tasseva ālambakaālambitabbatā taṃcittatā, tāya codetunti attho.
Adhigayhamanasikārakathāvaṇṇanā niṭṭhitā.
9.
Rūpaṃrūpāvacarārūpāvacarantikathāvaṇṇanā
768-770. Rūpaṃrūpāvacarārūpāvacarantikathāyaṃ heṭṭhāti cuddasamavagge āgatapariyāpannakathāyaṃ. ‘‘Samāpattesiya’’ntiādi vuttanayameva. Yañcettha ‘‘atthi rūpaṃ arūpāvacara’’nti arūpāvacarakammassa katattā rūpaṃ vuttaṃ, tattha ca yaṃ vattabbaṃ, taṃ aṭṭhamavagge arūperūpakathāyaṃ vuttanayamevāti.
Rūpaṃrūpāvacarārūpāvacarantikathāvaṇṇanā niṭṭhitā.
Soḷasamavaggavaṇṇanā niṭṭhitā.