Sedamocanakathā
679.
Sedamocanagāthāyo, paṭubhāvakarā varā.
680.
Paṭicca methunaṃ dhammaṃ, kathaṃ pārājiko siyā?
681.
Mukhena methunaṃ dhammaṃ, katvā pārājiko bhave.
682.
Methunapaccayā tassa, kathaṃ pārājiko siyā?
683.
Aṅgajātaṃ pavesento, sake pārājiko bhave.
684.
Saṃvidhānañca nevatthi, kathaṃ pārājiko siyā?
685.
Āṇattiñca vināyeva, hoti pārājiko yati.
686.
Parassa tu parikkhāraṃ, na ca pārājiko kathaṃ?
687.
Gaṇhanto theyyacittena, na ca pārājiko siyā.
688.
‘‘Maratū’’ti asappāya-bhojanaṃ deti ce cuto.
689.
Hantvānantariyaṃ kammaṃ, na phuseyya kathaṃ naro?
690.
Tasmānantariyaṃ natthi, māritesu ubhosupi.
691.
Gacchaṃ ṭhito nisinno vā, kathaṃ pārājiko bhaṇa?
692.
Sambhāvanādhippāyo so, atikkamati ce cuto.
693.
Kathaṃ? Kathehi me puṭṭho, vinaye ce visārado.
694.
Itthiyā paṭipajjanto, phuseyya caturo ime.
695.
Acaritvā yathāvuttaṃ, vattaṃ so vuṭṭhito kathaṃ?
696.
Parivatte tu liṅgasmiṃ, natthi saṅghādisesatā.
697.
Kuddho hoti ca nindito;
Atha ko nāma so dhammo;
Yena kuddho pasaṃsito?
698.
Ārādhako, sambuddhassa, yadi kujjhati nindito.
699.
Na khittacittonummatto, nirāpatti kathaṃ bhave?
700.
Natthi tassa panāpatti, vikālabhojanena hi.
701.
Sace bhuñjeyya āpatti, anāpatti kathaṃ bhave?
702.
Āgantvā idha kālena, natthi āpatti bhuñjato.
703.
Na harantova taṃ theyyā, kathaṃ pārājiko siyā?
704.
Parabhaṇḍaṃ agaṇhanto, hoti esa parājito.
705.
Methunaṃ tāya katvāpi, so na pārājiko kathaṃ?
706.
Tāya methunasaṃyoge, katepi na vinassati.
707.
Dvinnaṃ mātā pitā sāva, kathaṃ hoti bhaṇāhi me?
708.
Gaṇhāpeti paraṃ gabbhaṃ, tasmā mātā pitā ca sā.
709.
Parāmasati tassaṅgaṃ, anāpatti kathaṃ siyā?
710.
Dārakassa ca mātā hi, kātuṃ labhati bhikkhunī.
711.
Na pārivāsiko brūhi, na ukkhittādikopi ca?
712.
Na so labhati aññesaṃ, kappatīti ca niddise.
713.
Katamo puggalo brūhi, na mato na ca jīvati?
714.
Hoti nimmitabuddho so, na mato na ca jīvati.
715.
Pamāṇikamanārambhaṃ, āpatti saparikkamaṃ.
716.
Na muccateva vajjato, jinena vuttato tato.
717.
Sabbalakkhaṇahīnaṃ tu, karontassa kuṭiṃ pana?
718.
Bhikkhuno jinacandena, anāpatti pakāsitā.
719.
Na kiñci vācāya paraṃ bhaṇeyya;
Phuse garuṃ antimavatthuhetukaṃ;
Visārado ce vinaye bhaṇāhi tvaṃ?
720.
Ayaṃ pārājikāpattiṃ, tannimittaṃ garuṃ phuse.
721.
Na kiñci vācāya careyya pāpakaṃ;
Sunāsitoyeva ca nāsito siyā;
Kathaṃ tuvaṃ brūhi mayāsi pucchito?
722.
Ekādasa munindena, nāsitā te sunāsitā.
723.
Phuse vācasikaṃ vajjaṃ, kathaṃ me pucchito bhaṇa?
724.
Sampajānamusāvāde, dukkaṭaṃ tassa vaṇṇitaṃ.
725.
Cīvaraṃ gaṇhato honti, nānāāpattiyo kathaṃ?
726.
Cīvaraṃ hatthato tassā, pācitti paṭigaṇhato.
727.
Cīvaraṃ hatthato tassā, dukkaṭaṃ paṭigaṇhato.
728.
Thero thullaccayaṃ tesu, patto, sesā parājayaṃ.
729.
Haṭā therena māsā tu, tayo āṇattiyāpi ca.
730.
Pañca āṇattiyā haṭā;
Tasmā thullaccayaṃ thero;
Patto, sesā parājayaṃ.
731.
Chiddaṃ gehassa no atthi, methunapaccayā cuto.
732.
Santhatādivaseneva, katvā hoti parājito.
733.
Avītivatte sattāhe, kathaṃ āpatti sevato?
734.
Avītivatte sattāhe, hoti āpatti sevato.
735.
Ekatova kathaṃ bhikkhu, āpajjeyya bhaṇāhi me?
736.
Ekato pariṇāmento, payogena dvayaṃ phuse.
737.
Sabbe kareyyuṃ pana saṅghakammaṃ;
Bhikkhuṭṭhito dvādasayojanasmiṃ;
Kathaṃ kataṃ kuppati vaggahetu?
738.
Dvādasayojanike nagare tu;
Tattha kataṃ pana kammamakammaṃ;
Natthi vihāragatā yadi sīmā.
739.
Nissaggiyāni sabbāni, kathaṃ honti kathehi me?
740.
Bhikkhunī kāyaṅgāneva, tāni nissaggiyāni hi.
741.
Ānantariyakaṃ kammaṃ, āpajjati kathaṃ naro?
742.
Mātaraṃ purisattaṃ tu, gataṃ hantvā garuṃ phuse.
743.
Ānantariyakaṃ kammaṃ, nāpajjeyya kathaṃ naro?
744.
Mātaraṃ pitaraṃ hantvā, nānantariyakaṃ phuse.
745.
Kathaṃ kammaṃ akammaṃ taṃ, saṅgho sāpattiko siyā?
746.
Anāpattissa kammaṃ tu, sandhāyāti kurundiyaṃ.
747.
Kathamassa siyāpatti, sevamānassa dukkaṭaṃ?
748.
Paribhuñjati tassāya-māpatti paridīpitā.
749.
Apubbaṃ acarimaṃ eka-kkhaṇe āpajjate kathaṃ?
750.
Ṭhapitesu ca sattāhā-tikkame honti pañcapi.
751.
Na cāpi cittaṃ maraṇāya tassa;
Dentassa pārājikamāha satthā;
Thullaccayaṃ taṃ paṭigaṇhatopi.
752.
Hoti thullaccayaṃ tassa, salākaṃ paṭigaṇhato.
753.
Aruṇaṃ uṭṭhāpentassa, anāpatti kathaṃ siyā?
754.
Anāpatti hi so rukkho, hoti ekakulassa ce.
755.
Vatthukāyo hi kāyikā;
Apubbaṃ acarimaṃ eka-;
Kkhaṇe sambahulā phuse?
756.
Ekato gahaṇe tassa, honti sambahulā pana.
757.
Apubbaṃ acarimaṃ eka-kkhaṇe āpattiyo phuse?
758.
‘‘Sabbā tumhe sikharaṇiyo’’ti;
Vuttā dosā vinayanasatthe;
Tassitthīnaṃ gaṇanavasena.
759.
Methunaṃ na ca sevanto, methunappaccayā cuto?
760.
Methunappaccayā chejjaṃ, āpannā aṭṭhavatthukaṃ.
761.
Kenassa hoti āpatti, anāpatti ca ñātake?
762.
Siyāpatti satuppādaṃ, karoto mātarampi ca.
763.
Pāṭidesaniyaṃ thulla-ccayaṃ ekakkhaṇe phuse?
764.
Piṇḍaṃ gahetvā lasuṇaṃ paṇītaṃ;
Manussamaṃsañca akappamaññaṃ;
Sabbekato khādati, honti tassā.
765.
Ācariyako dvepi ca puṇṇavassā;
Ekāva tesaṃ pana kammavācā;
Ekassa kammaṃ tu na rūhate kiṃ?
766.
Ākāsago hoti sace paneko;
Katampi taṃ rūhati neva kammaṃ;
Ākāsagasseva, na bhūmigassa.
767.
Bhūmigassa na kātabbaṃ, karoti yadi kuppati.
768.
Nivatthassa panāpatti, anāpatti kathaṃ siyā?
769.
Na cassākappiyaṃ nāma, cīvaraṃ pana vijjati.
770.
Na tu deti ca kiñcipi bhojanato;
Garukaṃ pana vajjamupeti kathaṃ;
Vada me vinaye kusalosi yadi?
771.
Uyyojitā bhuñjati bhojanañce;
Uyyojitā yā pana yāya tassā;
Saṅghādisesaṃ kathayanti dhīrā.
772.
Neva ca gaṇhati kiñci kutoci;
Vajjamupeti lahuṃ, na garuṃ tu;
Brūhi kathaṃ yadi bujjhasi sādhu?
773.
Uyyojentī lahuṃ vajjaṃ, āpajjati nisevite.
774.
Chādeti, na phuse vajjaṃ, kathaṃ jānāsi me vada?
775.
Chādentopi tamāpattiṃ, nāññaṃ ukkhittako phuse.
776.
Dvijaṃ kantamakantañca, sace jānāsi me vada?
777.
Cittajo utujopi ca;
Dvīheva pana jātattā;
Mato saddo dvijoti hi.
778.
Sujanassa sukhānayane nayane;
Paṭu hoti padhānarato na rato;
Idha yo pana sāramate ramate.
Sedamocanagāthāyo samattā.