Dutiyo paricchedo
2.
Pakiṇṇakakathā
46.
Chattiṃsati vipākāni, kriyācittāni vīsati.
47.
Dvādasāruppacittāni, aṭṭhānuttaramānasā.
48.
Ekādasa kriyā ceti, catupaññāsa sabbathā.
49.
Āruppeti catukkāni, sattavīsa mahaggatā.
50.
Dasobhayampi missetvā, tālīsānuttarā siyuṃ.
51.
Pāpaṃ natthi kriyāpāpā, na vijjanti anuttare.
52.
Ekūnasaṭṭhi cittāni, puññapākakriyāvasā.
53.
Chattiṃsa tesaṃ pākāni, kriyā vīsa na cobhayaṃ.
54.
Pañcadvārāvajjanañca, duvidhaṃ sampaṭicchanaṃ.
55.
Manoviññāṇadhātūti, sattadhā dhātubhedato.
56.
Katvā manoviññāṇanti, cha viññāṇā pakittitā.
57.
Sāyanaṃ phusanañceva, sampaṭicchanatīraṇaṃ.
58.
Bhavaṅgaṃ cuti sandhīti, cittaṃ cuddasadhā ṭhitaṃ.
59.
Tīṇi tīraṇacittāni, ekaṃ voṭṭhabbanaṃ mataṃ.
60.
Kriyā ca pañcapaññāsa, javananti pavuccare.
61.
Ekādasa pavattanti, javanārammaṇe yato.
62.
Cutisandhibhavaṅgāni, cittānekūnavīsati.
63.
Mahaggatamahāpākā, upekkhātīraṇāti ca.
64.
Ekadviticatuppañcakiccaṭṭhānāni niddise.
65.
Rūpaṃ janenti ekūnavīsati netaradvayaṃ.
66.
Rūpaṃ janenti chabbīsa, paṇāmentiriyāpathaṃ.
67.
Dvattiṃsa rūpaviññattiiriyāpathasādhakā.
68.
Cuti khīṇāsavasseti, soḷasete na kiñcipi.
69.
Aṭṭhapaññāsa cittāni, paṇāmentiriyāpathaṃ.
70.
Na janenti tassampekaṃ, yathāvuttāni soḷasa.
71.
Hasanampi janentīti, catukiccāni terasa.
72.
Āruppe pana sabbampi, rūpāyattaṃ na vijjati.
73.
Rūpakkhandhova tesaṃ tu, attabhāvoti vuccati.
74.
Uddhaccarahitāpuññaṃ, caturāpāyabhūmiyaṃ.
75.
Uddhaccasahitañcāpi, satta pākāni paccati.
76.
Kāme mānasamukkaṭṭhaṃ, catukkaṃ tu tihetukaṃ.
77.
Soḷasa puññapākāni, pavatte tu vipaccati.
78.
Datvā dvihetukaṃ sandhiṃ, kāme sugatiyaṃ tathā.
79.
Dvādasa puññapākāni, vipaccati yathārahaṃ.
80.
Deti mānusake ceva, vinipātāsure tathā.
81.
Cattāripi catukkāni, pañcavokārabhūmiyaṃ.
82.
Yathābhūminiyāmena, deti pākaṃ yathāsakaṃ.
83.
Āruppānuttare pākaṃ, tathā rūpamasaññisu.
84.
Sañjanenti yathāyogaṃ, paṭisandhipavattiyaṃ.
Iti cittavibhāge pakiṇṇakakathā niṭṭhitā.
Dutiyo paricchedo.