Terasamo paricchedo
13.
Rāsiyogakathā
441.
Tesamevātha yogampi, cittuppādesu dīpaye.
442.
Sabbepi rāsayo honti, yathāsambhavato kathaṃ.
443.
Indriyaṭṭhakarāsī ca, maggapañcakarāsi ca.
444.
Dasāvasesā rāsī ca, lokapāladukādayo.
445.
Appamaññādvayañceva, tisso viratiyoti ca.
446.
Yevāpanakarāsī ca, labbhantiṭṭhārasāpi ca.
447.
Dhammā pana samatiṃsa, tattha honti sarūpato.
448.
Dhammā cekūnatālīsa, bhavanti pana sambhavā.
449.
Avasesā tu sabbepi, avibhattikanāmakā.
450.
Sattavīsa ca satteko, dvekeko ca yathākkamaṃ.
451.
Yathāsambhavavuttito, pañcadhā niyatā kathā.
452.
Paccekañca gahetvāpi, sattadhā yojanakkamo.
453.
Pañcakkhattuñca yojeyya, pañcatiṃsāti paṇḍito.
454.
Sarūpayevāpanake, niyatāniyate yathā.
455.
Labbhamānānumānena, sallakkhento tahiṃ tahiṃ.
456.
Vedanā parivattento, kāmapuññe ca sesake.
457.
Appamaññā ca hitvātha, mahāpāke ca yojaye.
458.
Pañcame appamaññāya, hitvā rūpe ca yojaye.
459.
Lokuttarindriyañceva, gahetvā viratittayaṃ.
460.
Upekkhitāni tevīsa, pañcamajjhāne ca sabbathā.
461.
Appamaññā rūpajjhāna-catukke ca mahākriye.
462.
Natthidvayampi āruppe, mahāpāke ca pañcame.
463.
Hānibuddhivasā sesā, na calanti kudācanaṃ.
464.
Dvayadvayavasā ceva, jhānapañcakatopi ca.
465.
Sāvajjesupi viññeyyā, viññunā rāsayo kathaṃ.
466.
Jhānapañcakarāsī ca, tathevindriyapañcakaṃ.
467.
Lokanāsakarāsī ca, samatho samathaddukā.
468.
Cattāro ceti labbhanti, tatthekādasa rāsayo.
469.
Tāni yevāpanakehi, chattiṃseva bhavanti ca.
470.
Savibhattikanāmā ca, nava dhammā pakāsitā.
471.
Ekādasa chaḷekā ca, kameneko punekako.
472.
Yojanānayabhedo ca, tasmā tattha na vijjati.
473.
Kukkuccamiti sāvajje, chaḷevāniyatā matā.
474.
Thinamiddhaṃ tayo sesā, paṭighadvayayogino.
475.
Chattiṃsa mānasā sabbe, hontāniyatayogino.
476.
Dve dvāvīsaṃ tayo ceva, nava cātha yathākkamaṃ.
477.
Tadaññesupi yojeyya, sāvajjesu yathākkamaṃ.
478.
Mohamūle kaṅkhuddhaccaṃ, gahetvā heturāsiyaṃ.
479.
Vedanaṃ parivattento, dosamūle ca paṇḍito.
480.
Pītiṃ chandañca momuhe;
Kaṅkhite adhimokkhañca,
Hitvā yojeyya rāsayo.
481.
Kaṅkhite parihīnāva, indriyādīsu pañcasu.
482.
Ahetukepi viññeyyā, yathāsambhavato kathaṃ.
483.
Phassapañcakarāsī ca, jhānaṭṭhānadukaṃ tathā.
484.
Eko manasikāroti, cattāro rāsayo siyuṃ.
485.
Ekadvayatikaṭṭhānā, chaḷeko ca punekako.
486.
Vitakko ca vicāro ca, adhikā jhānarāsiyaṃ.
487.
Vīriyañca samādhiñca, labbhatindriyarāsiyaṃ.
488.
Yevāpanādhimokkho ca, pañcaviññāṇavajjite.
489.
Sāvajje dvādasāpare;
Yogā hetumhi pañcete,
Tālīsekūnakā kathāti.
Iti cetasikavibhāge rāsiyogakathā niṭṭhitā.
Terasamo paricchedo.