Cuddasamo paricchedo
14.
Rāsisambhavakathā
490.
Navabhiṃsatisambhinnā, dasa dve savibhattikā.
491.
Sattavīsati satteko, dvayameko punekako.
492.
Aṭṭhavīsatisambhinnā, daseva savibhattikā.
493.
Aṭṭhārasa ca satteko, eko cekova pāpake.
494.
Terasettha asambhinnā, tayova savibhattikā.
495.
Iccānavajjā sāvajjā-hetuke yoganicchayo.
496.
Ahetuke ca maggādirāsayo natthi cuddasa.
497.
Cittuppādamhi nattheva, natthobhayamahetuke.
498.
Gahetabbā tu sabbattha, sādhāraṇā pakiṇṇakā.
499.
Jhānaṅgayogabhedena, rāsibhedaṃ tahiṃ tahiṃ.
500.
Catuvīsa parittesu, catudhā bhedamuddise.
501.
Karuṇāmuditā honti, kāmapuññamahākriye.
502.
Tasmā na pañcamāruppe, mahāpāke anuttare.
503.
Jhānānaṃ tulyapākattā, tappākesu ca labbhare.
504.
Sampatte ca samādāne, kāmapuññesu labbhare.
505.
Magge ca tulyapākattā, phale ca niyatā siyuṃ.
506.
Lokiye labbhamānāpi, visuṃ ceva siyuṃ na vā.
507.
Sarūpayevobhayakā, niyataṭṭha chaḷetare.
508.
Tattha cekaggatā natthi, indriyādīsu kaṅkhite.
509.
Uddhaccamekādasasu, majjhattamanavajjake.
510.
Aṭṭhaṭṭhavīsacatūsu, pañcadvīsu yathākkamaṃ.
511.
Savibhattikamaññattha, avibhattikameva taṃ.
512.
Iti sādhu sallakkheyya, sambhavāsambhavaṃ budhoti.
Iti cetasikavibhāge rāsisambhavakathā niṭṭhitā.
Cuddasamo paricchedo.